• rumantsch
• deutsch | 
• stamper | 

• Infurmaziuns
• Highlights
• Charta
• Biodiversited
• Discussiuns
• Sponsurs

La vschinauncha sparida illa Val Roseg In fatscha a la vschinauncha da Puntraschigna s’evra la Val Roseg, chi’d es per granda part territori da Samedan. A vain quinto, cha tar la seguonda alp da la val, sün üna planüra cuvierta hoz d’ün god, as rechattaiva da pü bodun üna vschinauncha. Tenor üna ditta hegia üna bouda ubain l’ova d’ün lej, chi’s vaiva furmo al pè dal vadret, desdrüt la vschinauncha. La ditta quinta, cha’l preir da Puntraschigna legiaiva pü tard adüna la prüma messa dal di per las ormas dals morts, e que sül lö da l’anteriura vschinauncha. Siand ch’el vaiva da partir da chesa aunz il fer di, cur cha’ls pros eiran auncha cuvierts da rosedi, s’ho sviluppo il nom «Messa da rosedi». Da lo deriva il nom dal vadret e da la val: Roseg. La giunfra da Morteratsch Il giuven sain Aratsch amaiva ad Annetta, la figlia dal pur il pü rich da Puntraschigna. Sieu bap la vaiva però impromissa al chastlaun. Aratsch es partieu per l’ester ed es dvanto sudo. Scu uffizier è‘l turno ed ho chatto a sia ameda sül let da mort, circundeda da fluors. Lönchezzas ho’l contemplo la fatscha sblecha, alura è’l saglieu in sella. In tuotta prescha è’l galoppo tar l’alp, inua ch’el vaiva perchüro la muaglia, ed inavaunt tal vadret. Lo ho’l do ils spruns a sieu chavagl ed es saglieu aint in üna sfessa dal vadret. Daspö lo nun ho üngün pü vis ad Aratsch. Ill’alp Morteratsch vivaiva da quel temp il vegl Gian. Da not udiva el in sia tegia üna rumur singulera, scu scha qualchün chaminess cun lat dad üna muotta a l’otra. Üna vusch feminina plüraiva: «Mort Aratsch, mort Aratsch!» Que d’eira il spiert d’Annetta, chi d’eira eir zieva sia mort auncha lio vi da l’amo. Gian laschaiva cha’l spiert fatscha, e cur ch’el ho glivro da fer da sain, ho’l arcumando a sieu successur da fer il listess. Daspö cha’l spiert saja gnieu, saja l’alp nempe dvanteda pü früttaivla, hegian las vachas do bger dapü lat, saja la gramma gnida pü grassa e saja be pü da rer disgrazcho ün armaint. Ma il sain giuven nun ho vulieu il spiert, e cur ch’el es darcho gnieu ed ho plüro: «Mort Aratsch, mort Aratsch!», ho il sain dit üna sgrischaivla blastemma ed ho s-chatscho a la povra orma our da chamanna. Daspö lo nu s’ho il spiert da la giunfra mê pü musso. Però da quel di davent es il vadret creschieu ad ün crescher ed ho infra cuort temp cuverno l’alp, la tegia e tuot la val. Be la chamanna Boval ot sur il vadret e l’Isla Persa immez il glatsch e la naiv algordan auncha a l’alp d’üna vouta. In nots quietas però s’oda our da la profundited il plandschöz per Aratsch. In algordanza a quist clam «Mort Aratsch» ho il vadret survgnieu il nom Morteratsch.

Informationen Beiträge und Diskussionen